TALAARAWAN: ika- 17 ng Pebrero; 2014; Lunes

“Sabi nga nila, tumitigas ang lupa pagkatapos ng malakas na ulan”

        ---Lola ni Prinsipe Gian sa Korean Novela na Princess Hours

Sinabi ito ng lola ni Gian sa ama ni Gian upang patungkulan ang pagkakasangkot ni Gian sa isang kaso at nangangamba na baka hindi kayanin ng kanyang anak ang sitwasyon.

Napakaganda ng ibig sabihin ng pahayag niyang ito. Nangagahulugan lang na may darating talaga sa ating buhay na isang napakalakas na bagyo upang tayo bilang mga lupa sa pahayag ay tumigas o tumibay pa. Kadalasan ang tao ay hindi sanay sa mga pagsubok at naghahanap agad tayo ng masisisi upang mabawasan ang bigat. Pero hindi natin lubos makita ang positibong epekto nito sa ating buhay pagkatapos ng bagyo.

Sa pinakabagong balita ngayon ay tungkol sa Bagyong Yolanda, na kung saan kumitil ng napakaraming buhay at sumira ng libo-libong tahanan. Maraming nanlumo at naawa sa mga nakasurvive sa isa sa pinakamalakas na bagyong ito. Hanggang ngayon pinipilit bumangon ng mga nasalanta na nangangahulugang pinalakas sila ng bagyo at pinatibay ang loob na kaya pala nila kahit ang pinakamalakas na bagyo pa.

Hindi ba’t hindi lang literal na bagyo ang mga pagsubok na dumarating sa ating buhay? Nariyan ang mawalan ng mahal sa buhay; ang masunugan ng tahanan; ang malugi sa negosyo; at marami pang iba. Kung sa mga mag-aaral naman- ang mawala sa top students; ang bumagsak sa isang subject; ang hindi makapasa sa periodical test at marami pa ring iba. Pero hindi ba’t dahilan ito upang lalo nating pahalagahan ang ating mga mahal sa buhay; dahilan para mas lalong mag-ingat sa mga gamit sa bahay; at dahilan para maging mas lalong maingat sa pagpapatakbo sa mga negosyo. Sa mga mag-aaral hindi ba’t naging dahilan ito upang mas lalong pagbutihin ang pag-aaral upang bumalik sa top students; dahilan upang mas mag pokus sa isang subject na bagsak ka; at dahilan para mas paghandaan ang periodical test. Madalas hindi natin napapansin na ang mga pagsubok pa lang ito ang nagpapatibay at nagpapalakas sa atin.

Sabi sa nabasa kong libro, Life has its spices and it is problems . Nangangahulugan lang na tama ang sinabi ng lola ni gian, darating at darating talaga sa atin ang malakas na bagyo nasa sa atin na lang kung paano natin ito haharapin. Dapat natin itong gawing instrumento upang lalo tayong maging mas malakas at produktibong mamamayan.