TALAARAWAN: ika-15 ng Pebrero; 2014; Sabad

Source: http://ranonline.e-games.com.ph/main.php/kapalaran-ngayong-august/ 

Ugat Ay Hindi Laging Kapalaran

                Ang mga puno ay may ugat, ang mga halaman, damo atbp ay may ugat. Lahat ng bagay sa mundo ay may ugat at kasama na rito ang mga tao. Oo, tayo ay may mga ugat din- ito ang mga pinagmulan natin.

                Sa mundo may dalawang estado sa buhay- ang mahirap at mayaman. Mapalad ang nagtagumpay at yumaman sa mundo. At sawi naman ang mga naghirap sa mundo. Kung babalikan natin ang nakaraan ng mga nagtagumpay sa lipunan, mapapansin natin na halos lahat sila ay galling sa mahihirap at kaunti lamang sa kanila ang pinalad na maipanganak na mayaman. Lahat sila ay nagsumikap, nagtiyaga, at nagpursige upang maiahon ang kanilang mga sarili sa kanilang ugat bilang mahirap. Nakaranas sila ng pang-aapi ng higit na may pera sa kanila. Nakaranas sila ng kalupitan ng mundong pinapaikot ng salapi. Pero ang mga karanasang ito ang nagpatibay sa kanila, ang dahilan kung bakit ninais nilang magtagumpay at makatulong sa kapwa nilang nasa dati nilang sitwasyon. Oo, tama pinili nila-pinili nilang mag-aral ng mabuti nang sa ganun ay mai-angat nila ang estado nila sa buhay.

                Kung susuriin naman natin ang nakaraan ng halos lahat ng mga mahihirap sa mundo, mapapansin natin na ang kanilang magulang; lolo at lola; at magulang ng kanilang mga lolo at lola ito’y mahihirap din. Hindi na nila minsan pang sinubok na ibahin ang kanilang estado dahil napaniwala sila na ito ang kanilang ugat at isinabuhay bilang kanilang kapalaran. Nanindigan sila na iyon ang kanilang kapalaran at wala silang kakayahang pumili at baguhin ito. Mas pinili nilang lamnan ang tiyan kaysa utak. Mas pinili nilang harapin lang ang ngayon lang kaysa paghandaan din ang hinaharap. Bakit? Simple lang dahil sa maling pananaw sa buhay. Nanatili silang naniniwala na mahirap sila at hindi nila kayang i-angat ang sarili sa lipunan. Pinili nila na husgahan sila batay sa kanilang mga ugat. Pinili nilang mabuhay batay sa kanilang ugat. At higit sa lahat karamihan sa kanila, piniling pumanaw nang hinidi umaalis sa kanilang ugat.

                Ang dalawang tauhan ay may parehas na ugat ngunit magkaiba ng kinahinatnan. Ang isa ay naging mayaman at ang isa naman ay nanatiling mahirap. Ito ay nangangahulugan na ang ating mga ugat ay hindi nagtatakda ng ating kapalaran dahil lahat ng pangyayari sa buhay natin ay ating pinili at ginusto.